कुन मन्दिरमा जान्छौ यात्री, कुन मन्दिरमा जाने हो ?
कुन सामग्री पूजा गर्ने, साथ कसोरी लाने हो ?
कुन मन्दिरमा जान्छौ यात्री, कुन मन्दिरमा जाने हो?
कुन सामग्री पूजा गर्ने, साथ कसोरी लाने हो?
कुन मन्दिरमा जान्छौ यात्री ?
हाडहरूको सुन्दर खम्बा, मांशपिण्डको दिवार
मष्तिस्कको सुनको छाना, इन्द्रियहरूको द्वार
नशा नदीका तर-तरंग, मन्दिर आफू अपार
कुन मन्दिरमा जान्छौ यात्री?
साथी-यात्री बीच सडकमा, ईश्वर हिँड्दछ साथ
चुम्दछ ईश्वर काम सुनौला गरिरहेको हात
छुन्छ तिलष्मी करले उसले, सेवकहरूको माथ
कुन मन्दिरमा जान्छौ यात्री ?
फर्क-फर्क, हे, जाऊ समाऊ, मानिसहरुको पाऊ
मलम लगाऊ आर्थहरूको, चहराई रहेको घाऊ
मानिसहरू भै ईश्वरको त्यो दिव्य मुहार हँसाऊ
कुन मन्दिरमा जान्छौ यात्री ?
सडक किनारा गाउँछ ईश्वर चराहरूको तानामा
बोल्दछ ईश्वर मानिसहरुको पिडा दुःखको गानामा
दर्शन किन्तु कहीं दिदैन चर्मचक्षुले कानामा
कुन मन्दिरमा जान्छौ यात्री, कुन मन्दिरमा जाने हो ?
कुन सामग्री पूजा गर्ने, साथ कसोरी लाने हो ?
कुन मन्दिरमा जान्छौ यात्री ?
Songwriter: Laxmi Prasad Devkota
Comments
Post a Comment